अमेरिका-इराण संघर्ष टळला! ट्रम्प यांची मोठी घोषणा; ऐतिहासिक कराराची तयारी”

वॉशिंग्टन : गेल्या काही दिवसांपासून अमेरिका आणि इराण यांच्यातील वाढत्या तणावामुळे जागतिक स्तरावर युद्धाची भीती निर्माण झाली होती. मात्र, अमेरिकेचे राष्ट्राध्यक्ष डोनाल्ड ट्रम्प यांनी परिस्थितीला नवे वळण देत इराणवरील संभाव्य हवाई आणि क्षेपणास्त्र हल्ले मागे घेतल्याची मोठी घोषणा केली आहे.

ट्रम्प यांनी सांगितले की, अमेरिका आणि इराण यांच्यात एका ऐतिहासिक करारावर स्वाक्षरी होण्याची प्रक्रिया अंतिम टप्प्यात असून, या आठवड्याअखेर किंवा सोमवारी युरोपमध्ये या करारावर शिक्कामोर्तब होण्याची शक्यता आहे.

या करारानंतर जागतिक व्यापारासाठी अत्यंत महत्त्वाची मानली जाणारी हार्मुझची सामुद्रधुनी पूर्णपणे खुली करण्यात येणार असल्याचेही ट्रम्प यांनी स्पष्ट केले. त्यामुळे मध्यपूर्वेतील तणाव कमी होण्यास मदत होईल आणि जागतिक अर्थव्यवस्थेलाही दिलासा मिळण्याची अपेक्षा व्यक्त केली जात आहे.

ट्रम्प यांच्या या घोषणेमुळे अमेरिका-इराण संघर्षाची शक्यता सध्या तरी कमी झाल्याचे मानले जात असून, जगभरातील देशांचे लक्ष आता या संभाव्य ऐतिहासिक कराराकडे लागले आहे.